అఫ్గనిస్థాన్ : భద్రతా బలగాలే లక్ష్యంగా ఆత్మాహుతి దాడి.. 34 మంది సైనికులు మృతి

11/29/2020
దశాబ్దాలుగా ఉగ్రదాడులు, బాంబు పేలుళ్లతో దద్దరిళ్లుతోన్న అఫ్గనిస్థాన్‌లో మరోసారి ముష్కర మూకలు పేట్రేగిపోయాయి. భద్రతా బలగాలే లక్ష్యంగా జరిగిన ఆత్మాహుతి దాడుల్లో 30 మందికిపైగా ప్రాణాలు కోల్పోగా.. మరో 36 మంది వరకు తీవ్రంగా గాయపడ్డారు. ఘాజ్నీ నగర శివార్లలోని ఓ కారులో పేలుడు పదార్థాలు నింపి ఆత్మాహుతి దాడికి పాల్పడ్డట్టు గుర్తించారు. తూర్పు ఘాజ్నీ ప్రావిన్సుల్లో తాలిబన్లకు, ప్రభుత్వ బలగాలకు నిత్యం పోరాటం జరుగుతూనే ఉంటుంది. ప్రస్తుత దాడిలో 31 మృతదేహాలను, 24 మంది క్షతగాత్రులను ఆసుపత్రికి తీసుకువచ్చారని, వారందరూ సైనికులేనని ఘాజ్నీ ఆసుపత్రి డైరెక్టర్ బాజ్ మహ్మద్ హెమత్ వెల్లడించారు.

దాడిపై అఫ్గన్ హోంమంత్రిత్వ శాఖ ప్రతినిధి తారిఖ్ అరియన్ స్పందిస్తూ.. ఓ ఆత్మాహుతి దళ సభ్యుడు పేలుడు పదార్థాలతో నింపిన వాహనంతో ఈ దాడికి పాల్పడ్డాడని తెలిపారు. ఈ దాడికి బాధ్యత వహిస్తూ ఇంతవరకు ఏ ఉగ్రవాద సంస్థ ప్రకటించలేదు. కొద్ది రోజుల కిందటే బమియాన్ నగరంలో రెండు శక్తిమంతమైన పేలుళ్లు సంభవించి 14 మంది మృత్యువాతపడ్డారు.

ఆత్మాహుతి దాడికి ముందు పేలుడు పదార్థాలతో కూడిన కారును నడుపుకుంటూ ఆగంతకుడు ఆర్మీ కమాండో స్థావరంలోకి చొచ్చుకొచ్చాడని అఫ్గన్ జాతీయ భద్రతా మండలికి చెందిన ఓ అధికారి అన్నారు. తన పేరు వెల్లడించడానికి అంగీకరించని ఆయన మీడియాతో నేరుగా మాట్లాడటానికి నిరాకరించారు.

అటు, దక్షిణ అఫ్గనిస్థాన్‌లోనూ ప్రావిన్సుల చీఫ్ అత్తాజన్ హక్బత్ కాన్వాయ్‌ను లక్ష్యంగా చేసుకుని ఆత్మాహుతి దాడికి పాల్పడిన ఘటనలో ముగ్గురు ప్రాణాలు కోల్పోగా.. మరో 12 మంది గాయపడ్డారు. ఈ దాడిలో హక్బత్ సురక్షింతగా బయటపడ్డారు. ఆయన అంగరక్షకుల్లో ఇద్దరు చనిపోయారు. గాయపడినవారిలో చిన్నారులు కూడా ఉన్నారు.

ఖతార్ వేదికగా తాలిబన్లు, అఫ్గన్ ప్రభుత్వానికి మధ్య శాంతి చర్చలు జరుగుతున్న సమయంలోనే ఈ దాడులు జరగడం ప్రాధాన్యత సంతరించుకుంది. దశాబ్దాలుగా కొనసాగుతున్న మారణహోమానికి ముగింపు పలికేందుకు ఈ ఏడాది జనవరిలో తొలి అడుగు పడింది. శాంతి చర్చలకు అమెరికా మధ్యవర్తిత్వం వహిస్తోంది. అమెరికా తన బలగాలను క్రమంగా ఉపసంహరించుకుని, అఫ్గన్‌లో శాంతికి ప్రయత్నిస్తోంది. వచ్చే జనవరి నాటికి మరో 2,500 మంది అమెరికా సైనికులు అఫ్గన్ వదలి వెళ్లనున్నారు.

Other news

More News

-Next--Last