IPL 2021లో ముంబయి సంచలన విజయం.. ప్లేఆఫ్స్ నుంచి రాజస్థాన్ ఔట్

10/5/2021
ఐపీఎల్ 2021 సీజన్‌లో ప్లేఆఫ్స్ ఆశలు నిలవాలంటే తప్పక గెలవాల్సిన మ్యాచ్‌లో ముంబయి ఇండియన్స్ జూలు విదిల్చింది. రాజస్థాన్ రాయల్స్‌తో షార్జా వేదికగా మంగళవారం రాత్రి జరిగిన మ్యాచ్‌లో తొలుత బౌలింగ్‌లో చెలరేగిన ముంబయి ఇండియన్స్.. ఆ జట్టుని 90 పరుగులకే కట్టడి చేసి.. అనంతరం లక్ష్యాన్ని 8.2 ఓవర్లలోనే 94/2తో ఛేదించేసింది. ఛేదనలో ఓపెనర్‌గా ఆడిన ఇషాన్ కిషన్ (50 నాటౌట్: 25 బంతుల్లో 5x4, 3x6) మెరుపు హాఫ్ సెంచరీ బాదేయగా.. ఆరో విజయంతో పాయింట్ల పట్టికలోనూ ముంబయి టీమ్ ఏడు నుంచి ఐదో స్థానానికి ఎగబాకింది. మరోవైపు 8వ ఓటమితో ఏడో స్థానానికి పడిపోయిన రాజస్థాన్.. ప్లేఆఫ్స్ రేసు నుంచి నిష్క్రమించింది.

91 పరుగుల ఛేదనలో కెప్టెన్ రోహిత్ శర్మ (22: 13 బంతుల్లో 1x4, 2x6) దూకుడుగా ఆడేయగా.. ఇన్నింగ్స్‌ 4వ ఓవర్‌లోనే అతడ్ని చేతన్ సకారియా ఔట్ చేసేశాడు. ఆ తర్వాత వచ్చిన సూర్యకుమార్ యాదవ్ (13: 8 బంతుల్లో) కూడా క్రీజులో ఉన్నంతసేపు బ్యాట్ ఝళిపించే ప్రయత్నం చేశాడు. కానీ.. ఈ క్రమంలో ముస్తాఫిజుర్ బౌలింగ్‌లో అతనూ ఔటైపోవడంతో.. మ్యాచ్‌లో రాజస్థాన్ పుంజుకునేలా కనిపించింది. కానీ.. ఎడాపెడా ఫోర్లు, సిక్సర్లు బాదిన ఇషాన్ కిషన్.. సిక్స్‌తో హాఫ్ సెంచరీని పూర్తి చేసుకోవడంతో పాటు మ్యాచ్‌ని కూడా ముగించేశాడు.

మ్యాచ్‌లో అంతకముందు టాస్ గెలిచిన ముంబయి ఇండియన్స్ కెప్టెన్ రోహిత్ శర్మ ఫీల్డింగ్ ఎంచుకున్నాడు. దాంతో.. రాజస్థాన్ ఇన్నింగ్స్ ప్రారంభించిన ఓపెనర్లు ఎవిన్ లూయిస్ (24: 19 బంతుల్లో 3x4, 1x6) , యశస్వి జైశ్వాల్ (12: 9 బంతుల్లో 3x4) పవర్‌ప్లేలో దూకుడుగా ఆడే ప్రయత్నం చేశారు. కానీ.. నాలుగో ఓవర్‌లో టీమ్ స్కోరు 27 వద్ద యశస్వి ఔటవగా.. అనంతరం కొద్దిసేపటికే లూయిస్ కూడా ఔటైపోయాడు. ఇక అక్కడి నుంచి ఏ దశలోనూ రాజస్థాన్ కోలుకోలేకపోయింది. కెప్టెన్ సంజు శాంసన్ (3), శివమ్ దూబె (3), గ్లెన్ ఫిలిప్స్ (4), శ్రేయాస్ గోపాల్ (0), చేతన్ సకారియా (6) సింగిల్ డిజిట్‌కే వికెట్లు చేజార్చుకున్నారు. అయితే.. మిడిల్ ఓవర్లలో కాసేపు ఓపికగా క్రీజులో నిలిచిన డేవిడ్ మిల్లర్ (15: 23 బంతుల్లో), రాహుల్ తెవాటియా (12: 20 బంతుల్లో).. రాజస్థాన్ టీమ్ పరువు నిలిపే ప్రయత్నం చేశారు. కానీ.. ఇద్దరూ మరీ అతి జాగ్రత్తగా బ్యాటింగ్ చేయడంతో.. రాజస్థాన్ దాదాపు 10 ఓవర్ల పాటు కనీసం ఒక్క బౌండరీ కూడా కొట్టలేకపోయింది. చివరి ఓవర్‌లో ముస్తాఫిజుర్ రెహ్మాన్ (8 నాటౌట్: 7 బంతుల్లో 1x5) ఒక సిక్స్ కొట్టడంతో.. 90 పరుగుల మార్క్‌నైనా అందుకోగలిగింది. ముంబయి బౌలర్లలో కౌల్టర్ నైల్ (4/14), జేమ్స్ నీషమ్ (3/12), జస్‌ప్రీత్ బుమ్రా (2/14) కెరీర్ బెస్ట్ గణాంకాలు నమోదు చేశారు.

More news

Related News